ویب نیوز ڈیسک: دنیا کی مقبول ترین میسجنگ ایپ WhatsApp نے صارفین کی پرائیویسی بہتر بنانے کے لیے ایک اہم قدم اٹھاتے ہوئے نیا “یوزر نیم فیچر” متعارف کرا دیا ہے، جس کے بعد اب صارفین کو رابطے کے لیے اپنا فون نمبر شیئر کرنے کی ضرورت نہیں رہے گی۔
رپورٹس کے مطابق یہ فیچر ابتدائی طور پر بیٹا ورژن میں محدود صارفین کے لیے متعارف کرایا گیا ہے، تاہم کمپنی اسے مرحلہ وار دنیا بھر کے تمام صارفین تک پہنچانے کا ارادہ رکھتی ہے۔ اس فیچر پر کام کافی عرصے سے جاری تھا اور نومبر 2025 میں کمپنی کی جانب سے کاروباری صارفین کو اس حوالے سے پیشگی آگاہ بھی کیا گیا تھا۔
نئے فیچر کے تحت صارفین اب انسٹاگرام اور دیگر سوشل میڈیا پلیٹ فارمز کی طرح اپنے فون نمبر کے بجائے ایک منفرد یوزر نیم کے ذریعے رابطہ قائم کر سکیں گے۔ اس کا سب سے بڑا فائدہ یہ ہے کہ صارفین کی ذاتی معلومات، خصوصاً فون نمبر، غیر ضروری طور پر شیئر نہیں ہوں گے، جس سے پرائیویسی میں نمایاں اضافہ ہوگا۔
ٹیک ماہرین کے مطابق اگر کوئی نیا شخص آپ سے رابطہ کرنا چاہتا ہے تو وہ صرف آپ کا یوزر نیم استعمال کرے گا، جبکہ آپ کا فون نمبر مکمل طور پر پوشیدہ رہے گا۔ یہ فیچر خاص طور پر ان صارفین کے لیے مفید ثابت ہوگا جو سیکیورٹی اور پرائیویسی کو ترجیح دیتے ہیں۔
فیچر کے استعمال کا طریقہ بھی نہایت آسان رکھا گیا ہے۔ صارفین واٹس ایپ کی سیٹنگز میں جا کر اپنے پروفائل سیکشن میں یوزر نیم کا آپشن چیک کر سکتے ہیں۔ اگر یہ فیچر دستیاب ہو تو وہ اپنی مرضی کا منفرد یوزر نیم منتخب کر سکتے ہیں۔
ذرائع کے مطابق یوزر نیم بنانے کے لیے کچھ مخصوص قواعد بھی متعین کیے گئے ہیں، جن کے تحت ہر یوزر نیم منفرد ہونا لازمی ہوگا۔ مزید یہ کہ یہ یوزر نیم Meta کے دیگر پلیٹ فارمز جیسے Instagram اور Facebook کے ساتھ بھی ہم آہنگ ہو سکتا ہے، بشرطیکہ صارف اپنے اکاؤنٹس کو لنک کرے۔
مزید برآں، سیکیورٹی کو بہتر بنانے کے لیے ایک خصوصی “چار ہندسوں کی کلید (Key)” بھی فراہم کی جائے گی، جس سے اکاؤنٹ مزید محفوظ بنایا جا سکے گا۔
ماہرین کا کہنا ہے کہ یہ نیا فیچر نہ صرف صارفین کی رازداری میں اضافہ کرے گا بلکہ نئے روابط بنانے کو بھی آسان بنائے گا، جو کہ ڈیجیٹل کمیونیکیشن کے مستقبل کی جانب ایک اہم پیش رفت ہے۔
