بلاگر: تنویرقاسم خان
پاکستان میں گرمیاں شروع ہوتے ہی عام آدمی کا سب سے بڑا ڈر ‘بجلی کا بل’ ہوتا ہے۔ ہر مہینے بل دیکھ کر دل کی دھڑکنیں تیز ہو جانا اب ایک معمول بن چکا ہے۔ ایسے میں اگر آپ سے کہا جائے کہ آپ کو لاکھوں روپے کا سولر سسٹم لگوانے کی ضرورت ہے یا گھر میں دوسرا میٹر پاس کروانا پڑے گا، تو شاید یہ ہر ایک کے بس کی بات نہ ہو۔
لیکن مایوس مت ہوں! ایک ایسا اسمارٹ طریقہ بھی ہے جس پر عمل کر کے آپ بھاری انویسٹمنٹ کے بغیر اپنے بجلی کے بل میں واضح کمی لا سکتے ہیں۔ ائیے جانتے ہیں کیسے۔
مسئلہ کیا ہے؟ پرانے پنکھے اور پروٹیکٹڈ صارف (Protected Consumer) کا درجہ
کیا آپ جانتے ہیں کہ آپ کے گھر میں لگے چھت کے عام پنکھے بجلی کے سب سے بڑے چور ہیں؟ ایک عام پرانا پنکھا تقریباً 100 واٹ بجلی لیتا ہے۔
اگر آپ کے گھر میں صرف دو پنکھے بھی دن رات (24 گھنٹے) چلتے ہیں، تو وہ مہینے کے 180 یونٹ صرف کر دیتے ہیں۔ اب آپ خود سوچیں، اگر 180 یونٹ صرف دو پنکھے کھا جائیں گے، تو فریج، استری اور لائٹس ملا کر آپ کا سنگل میٹر کبھی بھی پروٹیکٹڈ کیٹیگری (200 یونٹ سے کم) میں کیسے رہ سکتا ہے؟ جیسے ہی آپ پروٹیکٹڈ کیٹیگری سے باہر نکلتے ہیں، بجلی کی قیمت دگنی ہو جاتی ہے۔
حل: انورٹر (AC/DC) پنکھوں پر شفٹ ہوں!
اگر آپ سولر پینل نہیں لگوا سکتے، تو کم از کم اپنے 100 واٹ کے پرانے پنکھوں کو 30 واٹ کے انورٹر یا AC/DC پنکھوں سے تبدیل (Replace) کر لیں۔ آپ کو پورے گھر کے پنکھے بدلنے کی ضرورت نہیں، صرف وہ ایک یا دو پنکھے بدل لیں جو گرمیوں میں مسلسل چلتے ہیں۔
انورٹر پنکھے کے 4 شاندار فائدے:
70 فیصد بجلی کی بچت: انورٹر پنکھے پرانے پنکھوں کے مقابلے میں 70% کم بجلی لیتے ہیں۔ جہاں پرانا پنکھا دن رات چلنے پر 3 یونٹ لیتا ہے، وہاں انورٹر پنکھا صرف 1 یونٹ لیتا ہے۔ یعنی ماہانہ 90 یونٹ کی جگہ صرف 30 یونٹ!
یو پی ایس (UPS) پر لمبا بیک اپ: ایک ذاتی تجربے کے مطابق، جب بجلی 16 گھنٹے بند رہی تو انورٹر پنکھا یو پی ایس پر مسلسل چلتا رہا، جبکہ پرانا پنکھا محض 6 گھنٹے میں یو پی ایس ڈاؤن کر دیتا ہے۔
دو ماہ میں پیسے پورے (ROI): مارکیٹ میں ایک اچھا انورٹر پنکھا 10 سے 12 ہزار روپے میں مل جاتا ہے۔ یہ پنکھا دو مہینوں میں اتنی بجلی بچا لیتا ہے کہ اپنی قیمت خود پوری کر دیتا ہے۔ اس کے بعد یہ آپ کے لیے بالکل مفت ثابت ہوتا ہے۔
آرام اور سہولت: پرانے ڈمر کے پاس جانے کی ضرورت نہیں، آرام سے بیڈ پر لیٹ کر ریموٹ کے ذریعے اسپیڈ کم یا زیادہ کریں۔
مارکیٹ میں بہترین برانڈز اور قیمت
اگر آپ نیا پنکھا خریدنے کا ارادہ کر رہے ہیں، تو مارکیٹ میں غیر معروف کمپنیوں کے 6 سے 7 ہزار والے سستے پنکھے بھی مل جائیں گے، لیکن ہماری تجویز ہے کہ ایک ہی بار اچھی چیز خریدیں تاکہ بار بار کا لوشا ختم ہو۔
پاکستان میں اس وقت درج ذیل برانڈز 5 سال کی وارنٹی کے ساتھ بہترین نتائج دے رہے ہیں:
(یہ صرف بلاگر کی اپنی رائے ہےپنکھے کی خریداری اپنے بجٹ اور اپنے بہترین سوچ بچار کے مطابق کریں)
پاک فین (Pak Fan)
خورشید فین (Khurshid Fan)
ایس کے فین (SK Fan)
تیمور فین (Taimoor Fan)
یہ بھی پڑھئیے: پاکستان میں بجلی کے بھاری بلوں سے نجات: سولر سسٹم لگوانے کا مکمل خرچہ اور طریقہ
بچت کی ا ایک اور ٹپ: آپ کا پرانا پنکھا بھی ضائع نہیں جائے گا، وہ مارکیٹ میں آرام سے 3 ہزار روپے تک فروخت ہو جاتا ہے، جس سے آپ کے نئے پنکھے کی لاگت مزید کم ہو جائے گی۔ آپ اپنی پسند کے مطابق سادہ یا فینسی ماڈل منتخب کر سکتے ہیں، دونوں کی کوالٹی اور پرفارمنس یکساں ہوتی ہے۔
انورٹر پنکھے کو خراب ہونے سے کیسے بچائیں؟ (اہم ہدایات)
انورٹر پنکھے دیرپا ہوتے ہیں، بشرطیکہ آپ ان کا درست استعمال کریں۔ ان دو باتوں کا خاص خیال رکھیں:
ڈمر کا استعمال نہ کریں: اگر آپ کے گھر کی وائرنگ کا کوئی مسئلہ نہیں ہے، تو پنکھے کو بورڈ کے روایتی ڈمر سے اٹیچ نہ کریں۔
صرف ریموٹ استعمال کریں: ان پنکھوں کو ہمیشہ کمپنی کے فراہم کردہ ریموٹ سے ہی آن/آف اور کنٹرول کریں۔ اس طرح ان کی لائف بڑھ جاتی ہے اور یہ خراب نہیں ہوتے۔
نتیجہ (Conclusion)
بڑھتی ہوئی مہنگائی کے اس دور میں شکایتیں کرنے سے بل کم نہیں ہوگا۔ عقلمندی اسی میں ہے کہ اسمارٹ فیصلے کیے جائیں۔ اس سال صرف ایک یا دو انورٹر پنکھے لگا کر دیکھیں، آپ کے بجلی کے بل میں واضح کمی خود آپ کو حیران کر دے گی۔
کیا آپ نے ابھی تک اپنے گھر میں AC/DC پنکھا لگایا؟ اپنا تجربہ نیچے کمنٹس میں ضرور شیئر کریں!
