حنین شاہ کی شاندار بولنگ، آخری اوور میں میچ کا پانسہ پلٹ دیا، حیدرآباد کنگزمین کا فائنل میں پشاور زلمی سے مقابلہ

حیدرآباد کنگزمین کی مضبوط بیٹنگ

ٹاس جیت کر اسلام آباد یونائیٹڈ نے پہلے فیلڈنگ کا فیصلہ کیا، جس کے بعد حیدرآباد کنگزمین نے مقررہ 20 اوورز میں 5 وکٹوں کے نقصان پر 186 رنز بنائے۔

ٹیم کی جانب سے عثمان خان نے 61 رنز کی شاندار اننگز کھیلی، جس میں 10 چوکے شامل تھے۔ کپتان مارنوس لیبوشین نے 39، صائم ایوب نے 38 جبکہ کوشال پریرا نے 37 رنز بنا کر ٹیم کے مجموعے کو مضبوط کیا۔

اسلام آباد یونائیٹڈ کی جانب سے عماد وسیم نے 2 جبکہ کرس گرین، رچرڈ گلیسن اور فہیم اشرف نے ایک، ایک وکٹ حاصل کی۔

اسلام آباد یونائیٹڈ کی بھرپور کوشش مگر ناکامی

187 رنز کے ہدف کے تعاقب میں اسلام آباد یونائیٹڈ نے اچھا آغاز کیا، تاہم ٹیم مقررہ اوورز میں 184 رنز ہی بنا سکی۔

مارک چیپمین 43 رنز کے ساتھ نمایاں رہے جبکہ ڈیون کونوے نے 30، شاداب خان نے 22 اور کرس گرین نے 21 رنز اسکور کیے۔

میچ کا فیصلہ آخری اوور میں ہوا جب اسلام آباد کو جیت کے لیے 6 رنز درکار تھے، لیکن حیدرآباد کے فاسٹ بولر حنین شاہ نے صرف 4 رنز دے کر ٹیم کو فتح دلادی۔

حنین شاہ پلیئر آف دی میچ قرار

حیدرآباد کنگزمین کے فاسٹ بولر حنین شاہ کو شاندار بولنگ پر پلیئر آف دی میچ قرار دیا گیا۔ انہوں نے 4 اوورز میں 37 رنز دے کر 2 اہم وکٹیں حاصل کیں اور خاص طور پر آخری اوور میں بہترین اعصاب کا مظاہرہ کیا۔

دیگر بولرز میں محمد علی نے بھی 2 کھلاڑیوں کو آؤٹ کیا، جبکہ حسان خان، صائم ایوب اور عاکف جاوید نے ایک، ایک وکٹ حاصل کی۔

کپتانوں کا ردعمل

میچ سے قبل اسلام آباد یونائیٹڈ کے کپتان شاداب خان کا کہنا تھا کہ دباؤ کو بہتر انداز میں سنبھالنے والی ٹیم ہی کامیاب ہوگی۔ انہوں نے کہا کہ ٹیم پاور پلے میں بہتر کارکردگی دکھانے کی کوشش کرے گی۔

دوسری جانب حیدرآباد کنگزمین کے کپتان مارنوس لیبوشین نے کہا کہ وکٹ بیٹنگ کے لیے سازگار ہے اور ٹیم ہر صورتحال کے لیے تیار ہے۔