کراچی: پاکستان سپر لیگ سیزن 11 کے اہم میچ میں پشاور زلمی نے شاندار کارکردگی کا مظاہرہ کرتے ہوئے کوئٹہ گلیڈی ایٹرز کو شکست دے دی۔ اس کامیابی کے بعد زلمی نہ صرف پوائنٹس ٹیبل پر پہلے نمبر پر پہنچ گئی بلکہ پلے آف مرحلے تک رسائی کے امکانات بھی مزید روشن ہوگئے ہیں۔
نیشنل بینک اسٹیڈیم کراچی میں کھیلے گئے اس میچ میں پشاور زلمی کے کپتان بابر اعظم کا ٹاس جیت کر پہلے فیلڈنگ کا فیصلہ بالکل درست ثابت ہوا۔ کوئٹہ گلیڈی ایٹرز کی پوری ٹیم 20 اوورز میں 154 رنز بنا کر آؤٹ ہوگئی، جو کہ ایک درمیانہ ہدف ثابت ہوا۔
کوئٹہ کی جانب سے حسن نواز نے 37 رنز بنا کر نمایاں کارکردگی دکھائی، جبکہ رائلی روسو نے 26، خواجہ نافع نے 20، سعود شکیل نے 16 اور ٹام کرن نے 15 رنز اسکور کیے۔ تاہم کوئی بھی بیٹر بڑی اننگز کھیلنے میں کامیاب نہ ہو سکا۔
پشاور زلمی کی بولنگ لائن نے شاندار کھیل پیش کیا، خاص طور پر صفیان مقیم نے بہترین اسپیل کرتے ہوئے 3 اہم وکٹیں حاصل کیں اور اپنی ٹیم کو مضبوط پوزیشن میں لے آئے۔ محمد باسط نے بھی 3 کھلاڑیوں کو آؤٹ کیا جبکہ افتخار احمد نے ایک وکٹ حاصل کی۔
5 رنز کے ہدف کے تعاقب میں پشاور زلمی نے انتہائی پراعتماد انداز میں بیٹنگ کی اور صرف 19 اوورز میں 2 وکٹوں کے نقصان پر میچ جیت لیا۔
کپتان بابر اعظم نے ایک بار پھر اپنی کلاس دکھاتے ہوئے ناقابل شکست 71 رنز کی اننگز کھیلی اور ٹی ٹوئنٹی کرکٹ میں اپنی 100ویں نصف سنچری مکمل کی، جو کہ ایک اہم سنگ میل ہے۔
دیگر کھلاڑیوں میں محمد حارث نے 35 رنز بنا کر عمدہ ساتھ دیا، جبکہ کوشل مینڈس نے 21 اور ایرون ہارڈی نے 18 رنز بنا کر ٹیم کی جیت میں اہم کردار ادا کیا۔
کوئٹہ گلیڈی ایٹرز کی جانب سے الزاری جوزف اور سعود شکیل ایک، ایک وکٹ حاصل کر سکے، لیکن وہ ٹیم کو شکست سے نہ بچا سکے۔
میچ میں بہترین بولنگ کارکردگی پر صفیان مقیم کو پلیئر آف دی میچ قرار دیا گیا۔
اس کامیابی کے بعد پشاور زلمی نے 13 پوائنٹس کے ساتھ پوائنٹس ٹیبل پر اپنی پہلی پوزیشن مزید مستحکم کر لی ہے، جبکہ ٹیم کی پلے آف میں رسائی اب تقریباً یقینی دکھائی دے رہی ہے۔
