ویب ڈیسک: پاکستانی اداکارہ اور میزبان فضا علی نے حالیہ لائیو شو کی وائرل ویڈیو پر ہونے والی تنقید کے بعد اپنا مؤقف سامنے رکھ دیا ہے۔
سوشل میڈیا پر گردش کرنے والے ایک کلپ کے بعد مختلف حلقوں کی جانب سے شدید ردِعمل سامنے آیا، جس کے بعد فضا علی نے خاموشی توڑتے ہوئے وضاحتی بیان جاری کیا۔
اداکارہ نے اپنے انسٹاگرام اکاؤنٹ پر جاری بیان میں کہا کہ یہ لمحہ ایک ہلکے پھلکے اور غیر متوقع انداز میں پیش آیا تھا، جسے سوشل میڈیا پر اس کے اصل سیاق و سباق سے ہٹ کر پیش کیا جا رہا ہے۔
انہوں نے واضح کیا کہ اس عمل کے پیچھے کسی بھی قسم کی نامناسب نیت شامل نہیں تھی، بلکہ یہ محض ایک قدرتی اور دوستانہ ردِعمل تھا جو لائیو شو کے دوران سامنے آیا۔
فضا علی نے اپنے بیان میں مزید کہا کہ وہ ہمیشہ اپنے پیشے اور ناظرین کا بے حد احترام کرتی آئی ہیں اور آئندہ بھی اسی ذمہ داری اور اصولوں کے ساتھ اپنے کیریئر کو جاری رکھیں گی۔
یاد رہے کہ اس سے قبل مسلم لیگ (ن) کی رہنما حنا پرویز بٹ نے بھی اس معاملے پر سخت تنقید کرتے ہوئے اسے غیر مناسب قرار دیا تھا۔
سوشل میڈیا پر یہ معاملہ مسلسل زیرِ بحث ہے اور صارفین کی جانب سے مختلف آراء کا اظہار کیا جا رہا ہے۔
